Ein Münchener im Himmel

Text und Musik: Helmut Achtner

Als der Dienstmann Alois Hingerl einen Auftrag voller Hast
Erledigt hot, und er sich hinterm Ohrwaschl grod gratzt
Hots eahm einen Stich gem, er hot no kurz bleed gschaut
Dann hots an Alois Hingerl vom Stangerl obeghaut.
Zwoa Engl hamna auf der Stell in den Himme zerrt
Wo scho der Petrus gwart hot und der hotn glei belehrt.
Da host a Harfe Alois, Flügel und a Engelgwand
Und dann machtan mit der himmlischen Hausordnung bekannt.

Von achte bis um zwölfe muaßt auf deiner Wolke hocken
Und täglich mit der Harfe dann de ganze Zeit frohlocken
Von zwölfe bis auf d’Nacht um achte dann Hosianna singa
Da frogt der Alois grantig, und wann kriag i wos zum tringa?
Da sogt der Petrus streng zu eahm, werst scho dei Mana kriang
Und duat mit einem Taxiengel glei von dannen fliang
Auwehzwick denkt sich der Alois, mit dem Mana des wead fad.
Und fangt dann zum frohlocken o ganz brav und moderad.

Halelujah singt er hallelujah und die Wolke bebt
Wia a Engel a vergeistigter an eahm vorüberschwebt
Schreit glei der Alois glei ganz laut zu dem Engel hi, hey Sie
Herr Nachbar sog Herr Nachbar host koan Schmaizla da fia mi
Doch der Engel lispelt nur Hosianna, fliagt vergeistigt weita
Wos is dös fiar a Hanswurst, denkt sich Alois und dann schreit er
dann b’haltst dein Schmaizla, Engl ausgschamta und boaniga
und dannAlois frohlockt er weida, aba scho a bissl zorniga.

Halleluja sog i, Luja, in sei Harfn er neihaut
Halleluja. Himmi Herrgott, Saggrament, Erdäpfikraut
Er hot da so laut gfluacht und gschrian, sovui Lärm da gmacht
Das der liebe Gott sofort von sei'm Mittagsschlaf aufwacht.
Laßt den Petrus zu sich kemma, frogt ob er des da a hört
Wos is denn des für a Lümmel der da so gschert rumplärrt?
Und der Petrus führt den Alois sofort zum  liaben Gott
Der frogt den Alois streng warum so gschert er rumgeplärrt hot!

Doch der  Alois schimpft sofort und schreit: Sie mia duat des stinga
Bloß weil Sie der liaba Good san, miaßat i andauernd singa
Wiar a Zeiserl auf der Wolkn, Harfe spuin und dann kriagst hier
Herobm bloß a Mana doch koane Weißwürst und koa Bier!
Aha, ein Münchner sogt der Hergott, klar des haut net hi
Denn konnst da herom net braucha, der soll jede Woch fia mi.
meine göttlichen Ratschläge der bayrischn Regierung überbringa
So kummt der jede Woch nach Minga und duat a nimma singa!

Und der Alois fliegt a sofort los, den Briaf in seiner Hend
Doch wer den Alois Hingerl von seiner Erdenzeit her kennt
Der woaß der erste Weg vom Alois führt ins Hofbräuhaus
Und is der erst moaj drinnen, kummt der a Ewigkeit net raus
Denn da bstellt er sich glei eine Maß und no a Maß und no a Maß
Drum sitzt der Alois heint no drin im Hofbräuhaus so daß
de bayrische Regierung bin heint und des is hart
auf de göttliche Eingebung imma no vergeblich wart.