Helmut Achtner

Liedtexte

Erntedank

Text und Musik: Helmut Achtner

„De Saat muaß ma aussahn, daß ma erntn ko“
hot mei Opa oft gsagt, war a stattlicher Mo!
Er und de Oma warn kreizbrave Leit
ohne Sie gabs mei Muatta und mi net heit.
Sieg an Opa no sitzn, vor‘m Haus auf der Bank -
Erntedank

I wollt nia groaß wean, a Bua immer bleim
Wiar a wuida Wolf mi in de Wälder rumtreim!
An Indianerstamm gründ‘n, in am Tipi drin lem,
doch Indianer als Beruf hots damals net gem!
Nur Maurer und Metzger, oder wos in der Bank -
Erntedank

Hob Gitarre dann gspuit, jeder Finger hot kracht
hob an Reim mir auf‘s Lem und auf de Wead gmacht!
Des Theater beschrieben so guat i des konnte
S‘Lem is ja a Witz, aber meist ohne Pointe
So vui Texte und Liada lign hintn im Schrank -
Erntedank

Des Lem auf der Weat is sehr unbeständig
man is meist ganz lang doad und nur kurz lebendig
Des sogt de Statistik und so betrachtet
wean selbst glückliche Hehna am Ende geschlachtet
No bin i pumperlgsund, i war nie ernstlich krank -
Erntedank

I war nia a Bluatsauger, koa geldgeiler Sack
Gewinnmaximierung, i scho des Wort net dapack!
Vielleicht feaht mia einfach des Bluatsaugergen
i find Wörter wia Kleinkunst und Biergartn schön!
Drum war i nia bankrott - bloß oft pleite und blank -
Erntedank

Der Winter kummt oft vui zu friah und mit Macht
I hoff es is dann wer do, der mit dir lacht!
Der die umarmt, der die tröstet und hoat
wenn drausstn der Sturm faucht und es is bitterkoat
Gottseidank, du bist do, fangst mi aaf, wenn i wank -
Erntedank

zurück

Der Sofaist

Text und Musik: Helmut Achtner

Wos is der Sinn des Lebens, is des sinnvoll wos mia treim
Fia wos dean mia de Haxn und den Orsch uns aufreim
Fia wos de ganze Schinderei, frog mi wo des hiführt
I hob a Erleuchtung ghabt, i bin eitz konvertiert

Bin eitz a Sofaist, bin a Sofaist
Weil des fia mei Karma einfach super ist
A Sofaist duat auf‘m Sofa schnarcha
Recht vui mehra duat a Sofaist net macha

Olla mechtn Sie wos zreissn, bis es Sie zreisst vor Gier
Vo mia aus, es is eija Lem, des is net mei Bier
Nur zwengs der Karriere hetz i net um den Globus
flagg lieba auf‘m Kanapee in meinem eignen Modus

I bin a Sofaist, bin a Sofaist
Lieg i aufm Sofa, mach i koan Mist
Mach nix foasch, mach nix kaputt, i lieg nur rum
Ganz friedlich und hoff daß i in den Himme kumm

Ein Sofaist peitscht sich net mit der Rute
Ein Sofaist auch keinen Kreuzzug macht
Ein Sofaist glaubt noch an das Gute
Ein Sofaist sogt, in der Ruhe liegt die Kraft

Denn manche sprengan sich in d’Luft zwengs ihrer Religion
Fliang breckalweis dann umanand, des hams dann davon
Im Paradies man ihnen 70 Jungfrauen verspricht
Mia daat scho oane glanga, mehr dapack ich einfach nicht

I bin a Sofaist, bin a Sofaist
Wissn Sie wos a Sofaist auf seinem Sofa ißt
Er bricht das Brot, trinkt er zuvui Wein
A bissl Tradition muaß aufm Sofa sein

Doch auch a Sofaist muaß in d‘Arbat gehn
Kon net wia Jesus am 3. Dog erst auferstehn
Doch wenn ma ausgruaht is, der Frust sich net aufbaut
Man lafft net so schnell Amok, ma kriagt koa Burn-Out

Drum bin I a Sofaist, bin a Sofaist
Wenn Ihnen ihr Mittagschläfchen heilig ist
San für den Sofaismus Sie bereit
Denn wo a Sofa ist, is a Sofaist net weit!
Halleluja

zurück

Schöner wohnen

Text und Musik: Helmut Achtner

Mei Ultra-hightech-Haus is KI gesteuert
doch de moderne Technik is mir manchmoj net geheuer
Denn mei Staubsaugerroboter zwickt und beisst mi wo er ko
und a mei Thermomix faucht mi oft a ganz giftig o!
Mei Kühlschrank der bstellt Sachan de i net brauch und mog
weil i koa Katznfuada friss und a koa Katz net hob.
Mei Fernsehsessel mog mi net, lieg i drin dann schnappt er
wiar a Mausefalle zua, nimmt mi in Geiselhaft, der
lasst mi dann manchmal erst 5 Stund später wieder raus
da is der Virus drin in diesem hightech-Horrorhaus
  Des Haus steht net in Rocky Docky, es steht im Neubaugebiet
  und do drin wohnen Geister, de Geister die ich rief

Mei selbstfahrendes Auto fohrt in Urlaub ohne mi!
Irgendwos haut hier vom Boa weg nimma so ganz hi!
Denn dua i im Stehen pinkeln spritzt mei Klo mir hundsgemein
an fettn Wasserstrahl direkt ins Hosensdiardl rein.
Mei sprachbegabter Kuschel-Bär is a KGB-Spion
de wissn wann i Nosnbohr, wia oft i dusch und wo i wohn!
Mei Badezimmerspiegel schreit in der Friah scho aggressiv
mi o: i sollna net so bleed oschaun mit meinem Gfries
und moant dann no saufrech, ob i a meine Pillen nimm
denn er hot den Eindruck das ich hier im Haus nimma zrecht kimm
   Des Haus steht net in Rocky Docky, es steht im Neubaugebiet
   und do drin wohnen Geister, de Geister die ich rief

Und is mei Türschloss eigschnappt, sperrts mi einfach aus 
dabei bin eigentlich i doch hier der Herr im Haus
Doch des Haus hot eitz beschlossn, daß i überflüssig bin
Hot den Türcode einfach gändert, wo soll i eitz hin?
I penn im Stadtpark auf der Bank, wo mi de Vögl wecka
und oreidige Strassenköter mi im Gsicht obschlecka!
Wiar a Penner steh i jedn Dog frierend vor meim Haus
do schaut mei Haushaltshilfsroboter aus’m Fenster raus
der zoagt mir sein Stinkefinger ruaft süfisant tschau, tschau
i glaub mei Haushaltshilfsroboter pennt mit meiner Frau
   Des Haus steht net in Rocky Docky, es steht im Neubaugebiet
   und do drin wohnen Geister, de Geister die ich rief

zurück

← Zur Startseite